Google Search Console 設定教學（香港中小企 WordPress 版）：驗證網站、提交 Sitemap、睇客人搜咩字搵到你

GA4 話你知人入嚟之後做咗咩；Google Search Console（下面簡稱 GSC）就話你知人喺 Google 搜咩字搵到你——幾多次出現喺搜尋結果（曝光）、幾多人撳入嚟（點擊）、邊啲頁收咗錄、邊啲有問題。佢係 Google 免費工具，兩樣一齊用先睇得全。

WordPress 網站最快嘅做法：

已經跟我嘅 GA4 + GTM 設定教學裝咗 GTM：開一個「網址前置字元」資源，用「Google 代碼管理工具」方法驗證，唔使再郁網站。
想一次過包晒 www／非 www、http／https 同子網域：開「網域資源」，用 DNS 記錄驗證。
驗證完，交 Yoast 幫你整好嘅 sitemap_index.xml，再將 GSC 連去 GA4。

先講清楚一樣嘢：設定 GSC 唔會令你個網站排名上升。 Google 自己寫明，新增資源唔會影響網站喺搜尋結果嘅呈現，佢係俾你「睇數」同「發現問題」嘅工具。冇開 GSC，網站一樣可能出現喺 Google；開咗，你先睇得到 Google 點睇你個網站。

註：Google 介面成日改名同搬位，下面嘅按鈕名稱以 2026-10-31 Google 繁中說明為準，畫面以你帳戶為準。

呢篇係香港中小企網站及網店路線圖嘅 Step 4。

Search Console 同 GA4 有咩分別？點解兩樣都要？

	Search Console	GA4
睇緊嘅階段	人入嚟之前：喺 Google 搜尋結果嗰度	人入嚟之後：喺你網站入面
答到嘅問題	客人搜咩字見到你？出現咗幾多次？撳咗幾多次？邊啲頁收唔到錄？	入嚟睇咗咩頁？有冇撳 WhatsApp、打電話、填表？
數據嚟源	Google 搜尋	你網站上嘅追蹤碼

舉個例：GSC 話你知有人搜「觀塘會計公司報稅」見到你嘅服務頁；GA4 話你知嗰批人入嚟之後有冇撳 WhatsApp。淨係得一邊，你只係睇到半個故事。

兩邊數字唔會一模一樣，因為計法唔同，唔係出錯。點樣用呢個分別去決定改邊篇舊文，可以睇〈舊文章沒有流量，應該更新還是重寫？〉。

開始前準備（5 分鐘清單）

一個長期用嘅 Google 帳戶。 建議用公司或老闆自己嘅帳戶做擁有者，唔好用員工私人 Gmail——人走咗，權限都跟住走（呢點係我做客戶網站嘅經驗，唔係 Google 規定）。
用嚟驗證嘅帳戶要同 GTM／GA4 係同一個。 Google 要求用 GTM 或 GA 方法驗證時，Search Console 同 GTM／GA 要用同一個 Google 帳戶。
確認 WordPress 冇擋住搜尋引擎。 去 WordPress 後台「設定」>「閱讀」，睇「搜尋引擎可見度」嗰格冇剔到（新網站開發期間好多人剔咗，上線之後唔記得剔返走）。
知道你網站嘅正式網址。 係 https://？有冇 www？例如 dvmsp.com 用嘅係冇 www 嘅版本。開「網址前置字元」資源時，呢個要填得一模一樣。
知道 DNS 喺邊度管。 域名註冊商、Cloudflare 或者主機商——如果你唔知，可能喺當初幫你起網站嗰位 web designer 手上。

仲未有網站、或者想重溫起網站前要諗咩，可以先睇〈8 大事項︰新手架設網站前必須要知道〉。

第一步：新增資源——「網域」定「網址前置字元」？

入 Search Console，喺資源選取器揀「+ 新增資源」，會叫你揀兩種網站資源：

	網域資源	網址前置字元資源
填咩	只填網域，例如 `example.com`（唔好加 `https://`，唔好加 `www`）	完整網址，例如 `https://example.com/`（包括最後個 `/`）
包含	所有子網域（www、m 等）＋ http／https	只包含同一個開頭嘅網址；http 同 https、www 同非 www 當係唔同資源
驗證方法	只可以用 DNS 記錄	多種：HTML 檔案、HTML 標記、Google Analytics、Google 代碼管理工具、DNS

點揀？我嘅建議：

你自己管得到 DNS、想睇晒成個網域 → 開網域資源。
DNS 喺第三方手上，但你已經裝咗 GTM 或 GA4 → 開網址前置字元資源，用 GTM／GA 驗證，今日就做得完。
兩樣都開都得。 Google 容許同一個帳戶有多個資源，唔會互相影響。

揀完之後會彈出驗證方法。未準備好可以撳「稍候再驗證」，之後喺資源選取器揀返嗰個資源再驗證。

第二步：驗證擁有權（WordPress 常用 4 個方法）

方法 A：DNS 記錄（網域資源唯一方法）

Search Console 會俾你一條 TXT 記錄，格式係 google-site-verification=…。
登入你嘅域名／DNS 供應商，加一條 TXT 記錄：Host／Name 留空或者填 @，Value 貼返 Google 俾你嗰串字。
返去 Search Console 撳「驗證」。

要注意兩點：

Google 寫明，手動加嘅記錄，供應商最多可能需要兩到三天先開始提供；即時驗證唔到唔使慌，等一兩日再試。
驗證成功之後唔好刪呢條記錄，刪咗驗證就會失效。

方法 B：Google 代碼管理工具（已裝 GTM 最順手）

如果你跟咗 GA4 + GTM 設定教學，網站已經有 GTM 容器，呢個方法基本上撳幾下就完：

你要喺嗰個 GTM 容器有「發布」或「管理員」權限；
Search Console 同 GTM 要用同一個 Google 帳戶；
GTM 代碼入面 <noscript> 嗰段要緊接喺 <body> 開始標記後面——用 GTM4WP 之類外掛放碼，通常已經處理好，但最好喺首頁原始碼確認一次；
只適用於網址前置字元資源。

方法 C：Google Analytics

要求係：你喺 GA4 有「編輯」權限、同一個 Google 帳戶、首頁 <head> 入面有 gtag.js 程式碼片段。

如果你個 GA4 係經 GTM 裝（我教學嘅做法），首頁原始碼可能搵唔到直接嘅 gtag.js；Google 說明亦列咗一個錯誤訊息「我們在你網站中找到 Google 代碼管理工具程式碼片段」。遇到呢個情況，改用方法 B 會直接啲。

方法 D：HTML 標記（經 SEO 外掛貼）

揀「HTML 標記」，Google 會俾你一段 <meta name="google-site-verification" …>。WordPress 唔使改主題：

Yoast SEO：去 Yoast SEO 嘅設定，搵「Site connections（網站連結）」嗰度，喺 Google 欄位貼入去，儲存，再返 Search Console 撳「驗證」。
Rank Math：都有類似嘅驗證欄位，位置以 Rank Math 官方說明為準。
Site Kit by Google：Google 說明點名佢係「Google 官方唯一贊助的外掛程式」，可以幫你處理驗證。不過如果你已經用 GTM 裝咗 GA4，裝 Site Kit 前要小心唔好再加多一次 GA4 碼。

小貼士：加多一個驗證方法做後備

Google 建議可以喺同一個資源加多個驗證方法。例如你本身用 GTM 驗證，日後換主題、換外掛令 GTM 碼唔見咗，驗證就會失效；有 DNS 或者 HTML 標記做後備就穩陣啲。後備方法喺 Search Console「設定」>「擁有權驗證」度加。

第三步：提交 Sitemap

Sitemap 係一個網址清單，話俾 Google 知你網站有邊啲頁要檢索。

WordPress 嘅 Sitemap 喺邊？

用 Yoast SEO：通常係 https://你的網域/sitemap_index.xml（dvmsp.com 就係呢個）。
用 Rank Math：通常都係 /sitemap_index.xml。
冇裝 SEO 外掛：WordPress 自己會出一個 /wp-sitemap.xml。

最穩陣嘅確認方法：喺瀏覽器開 https://你的網域/robots.txt，睇入面 Sitemap: 嗰行寫咩網址——Yoast 會自動寫埋入去。

點提交：

喺 Search Console 左邊揀「Sitemap」報告。
喺「新增 Sitemap」方塊填入 Sitemap 網址（例如 https://你的網域/sitemap_index.xml），撳「提交」。實際輸入格以你畫面為準（有啲帳戶會預填網域）。
Yoast 嘅 sitemap_index.xml 係一個「Sitemap 索引」，入面已經包住文章、頁面、分類等子 Sitemap，交呢一個就夠，唔使逐個子 Sitemap 交。
狀態見到「成功」就得。

幾點要知：

只有資源擁有者先可以喺呢個報告提交 Sitemap。
Google 話提交之後會即時嘗試讀取，但要過一段時間先開始檢索入面嘅網址，而且唔保證會檢索晒。提交成功 ≠ 全部收錄，更加 ≠ 排名。
如果網站好細（Google 嘅講法係唔多過 500 頁），而且由首頁撳幾下就去得晒所有頁，Google 話你可能根本唔需要 Sitemap。不過 WordPress 用 Yoast 本身已經自動整好，交埋佢冇壞。

第四步：睇「網頁索引」報表——邊啲頁收咗錄？

網頁索引報表分兩色：綠色＝已建立索引，灰色＝未建立索引。

第一次睇好多老闆會嚇親，見到一大堆灰色。其實未建立索引唔一定係問題——Google 都話，重複網頁、加咗 noindex 嘅頁、已刪除嘅頁出 404，都係合理原因。你要確保嘅係：重要嘅頁（首頁、服務頁、主要文章）係綠色。

對中小企最實用嘅一句：如果你網站少過 500 頁，Google 話你可能唔使睇呢份報表。 直接喺 Google 搜：

site:你的網域 → 睇 Google 知道你邊啲頁
site:你的網域/某篇文章網址 → 睇嗰一頁有冇收錄

搵唔到重要嘅頁，先返嚟 GSC 睇原因。

單一頁有問題：用「網址檢查」工具。 喺 Search Console 頂部搜尋框貼入嗰頁網址，就會見到佢嘅索引狀態。新文發佈或者大改咗內容，可以喺度「要求建立索引」——但 Google 寫明即使提出要求，都唔會即時建立索引。全新網站或新網頁，Google 講法係大約一週左右先會開始檢索。

第五步：睇「成效」報表——客人搜咩字搵到你

呢個係我認為 GSC 對老闆最有用嘅報表。預設會顯示過去三個月嘅數據，有四個指標：

指標	意思
點擊次數	有幾多次人喺 Google 搜尋結果撳入你網站
曝光次數	你網站出現喺搜尋結果幾多次
點閱率	點擊次數 ÷ 曝光次數
平均排序	你網站喺搜尋結果嘅平均位置

下面嘅表可以按「查詢」、「網頁」、「國家/地區」、「裝置」、「搜尋外觀」、「日期」分組。

我建議香港中小企每月做一次：

日期揀上個月，同再上一個月比較。
「國家/地區」揀香港，隔走海外雜訊。
睇「查詢」分頁：客人用咩字搵到你？有冇啲字你從來冇諗過、但其實係你做緊嘅生意？
睇「網頁」分頁：邊幾頁帶最多點擊？邊啲頁曝光多但點擊少？

睇完點用？

曝光多、點擊少：通常要改標題同描述，或者內容唔夠答到問題——詳細判斷方法睇〈舊文章沒有流量，應該更新還是重寫？〉。
客人用「問題」嚟搜（例如「點樣…」「幾錢…」）：將呢啲問題變成文章或 FAQ，亦都係 AI 搜尋時代最實際嘅題材來源，做法睇〈2026 香港中小企 AI 搜尋優化實戰指南〉。
好多人搜「地區＋服務」：本地客多數同時會喺 Google 地圖搵你，記得一併整好 Google 商家檔案。

小提醒：Google 寫明，就算某個查詢喺清單出現，你自己去搜都未必見到自己個網站，因為搜尋結果會因時間、地點、裝置同搜尋記錄而唔同。所以唔好靠「自己搜一次」去判斷排名，睇報表數字會準確啲。

第六步：將 Search Console 連去 GA4

好多人做完頭五步就停咗，漏咗呢步。連咗之後，GA4 入面可以睇到 Google 自然搜尋嘅查詢字，同埋嗰批人入嚟之後做咗咩。

要求： 你喺 GA4 有「編輯者」角色，同時係 GSC 資源嘅已驗證擁有者。

步驟：

GA4 →「管理」→「產品連結」下面揀「Search Console 連結」。
撳「連結」，揀你管理嘅 Search Console 資源，確認。
揀你網站嘅網站資料串流，下一步，提交。

記住呢一步： 連好之後，Search Console 報表集合預設係未發布，要去 GA4 左邊「媒體庫」發布，先會喺報表選單見到。

其他要知：

一個網站資料串流只可以連一個 Search Console 資源。
Google 寫明 Search Console 收集資料後 48 小時，GA4 先用得到；GA4 入面最多睇到 16 個月 Search Console 數據。

GA4 本身點裝、點追 WhatsApp 同電話，睇返 GA4 + GTM 設定教學。

第七步：使用者權限（老闆一定要識）

GSC 權限喺「設定」>「使用者和權限」度管，只有擁有者睇到呢頁。主要有三種：

擁有者：全權，包括加減其他人。應該係你或者公司帳戶。
擁有完整權限的使用者：睇晒所有數據、做部分動作。
權限受限的使用者：睇大部分數據嘅簡易版本。

我嘅建議：

外判 SEO 公司或者 web designer，一般俾「擁有完整權限的使用者」或「權限受限的使用者」就夠，唔使俾擁有者。
合作完結就移除佢。 如果對方係「已驗證擁有者」（即係佢自己放咗 HTML 標記或 DNS 記錄驗證），單係喺 GSC 移除唔夠，要連佢嘅驗證權杖一齊刪，否則佢可以自己重新驗證返。GSC「使用者和權限」頁有「未使用的擁有權權杖」清單幫你搵。
見到唔識嘅擁有者要即刻處理。 Google 寫明，發現陌生擁有者表示你帳戶可能遭駭。

另外，Google 發現網站有索引問題、垃圾內容或其他問題時會發快訊俾你，所以擁有者帳戶要用一個真係有人睇嘅電郵。